ବର୍ଜ୍ୟବସ୍ତୁ ପରିଚାଳନା ବ୍ୟବସ୍ଥା ପରିଦର୍ଶନ ପାଇଁ ଓଡିଶାରେ ମଧ୍ୟପ୍ରଦେଶର ୧୧ ଜଣିଆ ପ୍ରତିନିଧି ଦଳ

ଭୁବନେଶ୍ୱର: ମଧ୍ୟପ୍ରଦେଶ ସରକାରଙ୍କ ୭ ଆଇଏଏସ୍‌ ଅଧିକାରୀଙ୍କ ସହ ମୋଟ ୧୧ ବରିଷ୍ଠ ଅଧିକାରୀଙ୍କ ଏକ ପ୍ରତିନିଧି ଦଳ ଆଜି ୩ ଦିନିଆ  ଓଡିଶା ଗସ୍ତ ଶେଷ କରିଛନ୍ତି । ଏହି ପ୍ରତିନିଧି  ଦଳଙ୍କୁ ଓଡିଶା ଅର୍ବାନ ଏକାଡେମୀ (ଓୟୁଏ)ରେ ଫାଇଭ-ଟି ଅନ୍ତର୍ଗତ ପରିମଳ ବ୍ୟବସ୍ଥା ଜରିଆରେ ଫେକାଲ୍‌ ସ୍ଲେଲଜ୍‌ ଏବଂ ସେପ୍‌ଟେଜ୍‌ ମ୍ୟାନେଜମେଣ୍ଟ, କଠିନ ବର୍ଜ୍ୟବସ୍ତୁ ପରିଚାଳନା ଏବଂ ସହରୀ ଗ୍ରାମୀଣ ସମନ୍ୱୟ ପାଇଁ ଓଡିଶା ମଡେଲ ବିଷୟରେ ସୂଚିତ କରାଯାଇଥିଲା ଓ ୨୫ ତାରିଖ ଦିନ ପ୍ରଥମେ ଓୟୁଏ କର୍ତ୍ତୃପକ୍ଷ ପ୍ରତିନିଧି ଦଳଙ୍କୁ ଓଡିଶା ଆପଣାଇଥିବା  ପରିମଳ ବ୍ୟବସ୍ଥାର ଆଭିମୁଖ୍ୟ ସମ୍ପର୍କରେ ଅବଗତ କରାଯାଇଥିଲା । 
ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଜି ମାଥିଭାଥନନ୍‌ ସେମାନଙ୍କୁ ଓଡିଶାର ସହରୀ ପରିବର୍ତ୍ତନ ଉପରେ ଆଲୋକପାତ କରାଇଥିଲେ ଓ ଏହାସହ ବିଭିନ୍ନ ସହରୀ ପରିମଳ ଏବଂ ଜଳ ଉତ୍ସର ବିକାଶ ଓ ସଂରକ୍ଷଣ ପ୍ରତି ନିଆଯାଇଥିବା ପଦକ୍ଷେପ ବିଷୟରେ ଅବଗତ  କରାଇଥିଲେ । ପରିମଳ କ୍ଷେତ୍ରରେ ସୁଧାର ଆଣିବା ଲାଗି ରାଜ୍ୟ ସରକାରଙ୍କ ଦ୍ୱାରା ମିଶନ ମୋଡରେ ନିଆଯାଉଥିବା ବିଭିନ୍ନ କାର୍ଯ୍ୟକ୍ରମ ଏବଂ ସେଥିରୁ ରାଜ୍ୟ କିପରି ଲାଭବାନ ହୋଇପାରୁଛି ତାହା ଦର୍ଶାଇଥିଲେ । 
ଓଡିଶା ଏହାର ଅଗ୍ରଗାମୀ ଫେକାଲ୍‌ ସ୍‌ଲେଜ୍‌ ଆଣ୍ଡ୍‌ ସେପ୍‌ଟେଜ୍‌ ମ୍ୟାନେଜମେଣ୍ଟ (ଏଫଏସଏସମ) ପାଇଁ ସର୍ବଭାରତୀୟ ସ୍ତରରେ ପ୍ରସିଦ୍ଧି ଲାଭ କରିଛି । ରାଜ୍ୟର ସମସ୍ତ ୧୧୫ ପୌରସଂସ୍ଥା ମଧ୍ୟରେ ୧୧୮ଟି ଫେକାଲ୍‌ ସ୍‌ଲେଜ୍‌ ଟ୍ରିଟମେଣ୍ଟ ପ୍ଲାଣ୍ଟ (ଏଫଏସଟିପିଏସ)/ସ୍‌ୱେରେଜ୍‌ ଟ୍ରିଟମେଣ୍ଟ ପ୍ଲାଣ୍ଟ (ଏସଟିପି) ନିର୍ମାଣ କରାଯାଇଛି । ଗ୍ରାମାଞ୍ଚଳ ଏବଂ ସହରାଞ୍ଚଳ ପରିମଳର ସମ୍ମିଶ୍ରଣକୁ ନେଇ ରାଜ୍ୟବ୍ୟାପୀ  କାର୍ଯ୍ୟ କରାଯାଉଛି ଓ ଜଳ, ପରିମଳ ଏବଂ ଅନ୍ତର୍ଭୂକ୍ତ ସହରାଞ୍ଚଳ ବିକାଶ କ୍ଷେତ୍ରରେ ଦକ୍ଷତା ବୃଦ୍ଧି ଇକୋସିଷ୍ଟମକୁ ମଜବୁତ କରିବା ପାଇଁ  ଓୟୁଏର ଭୂମିକାକୁ ନେଇ ପ୍ରମୁଖ ଶାସନ ସଚିବ ଶ୍ରୀ ମାଥିଭାଥନନ୍‌ ମଧ୍ୟପ୍ରଦେଶ ପ୍ରତିନିଧି ଦଳଙ୍କୁ ଅବଗତ କରାଇଛନ୍ତି । 
 ପୌର ନିର୍ଦ୍ଦେଶକ ତଥା  ମିଶନ୍‌ ନିର୍ଦ୍ଦେଶକ ଏସ୍‌ବିଏମ୍‌ ସଂଗ୍ରାମଜିତ  ନାୟକ ଏହି ଅବସରରେ ଉପସ୍ଥିତ  ରହି ବିଭିନ୍ନ ଲୋକକେନ୍ଦ୍ରିକ କାର୍ଯ୍ୟକ୍ରମ , ଏଫଏସଏସଏମ୍‌ ମୂଲ୍ୟ ଶୃଙ୍ଖଳା, ଗାରିମା, ଡାଇଟ୍‌ ପ୍ଲାଟଫର୍ମ ଏବଂ ରାଜ୍ୟରେ ସହରାଞ୍ଚଳ-ଗ୍ରାମୀଣ ସମ୍ମିଶ୍ରଣ ପାଇଁ ପଦକ୍ଷେପ ବିଷୟରେ ବିସ୍ତୃତ ଆଲୋଚନା କରିଥିଲେ୤ ଏହି ଅବସରରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ସଚିବ ଦୁର୍ଗେଶ ନଦିନୀ ସାହୁ, ପାନୀୟ ଜଳ ଏବଂ ପରିମଳ ନିର୍ଦ୍ଦେଶକ ବି ପରମେଶ୍ୱରନ୍‌ ଏବଂ ଅନ୍ୟ ବିଭାଗୀୟ ଅଧିକାରୀ ବିଭିନ୍ନ ପ୍ରସଙ୍ଗରେ ମଧ୍ୟପ୍ରଦେଶର ପ୍ରତିନିଧି  ଦଳଙ୍କ ସହ ଆଲୋଚନା କରିଥିଲେ । ବୈଠକ ପରେ ମଧ୍ୟପ୍ରଦେଶରୁ ଆସିଥିବା ପ୍ରତିନିଧି ଦଳ ଭୁବନେଶ୍ୱରର ବାସୁଆଘାଇରେ ଓୟୁଏ ଏବଂ ଏଫଏସଟିପି ପରିଦର୍ଶନ କରିଥିଲେ ଓ ଦ୍ୱିତୀୟ ଦିନରେ ଭୁବନେଶ୍ୱରରେ କାର୍ଯ୍ୟକ୍ଷମ ଥିବା ମାଇକ୍ରୋ କମ୍‌ପୋଷ୍ଟିଂ ସେଣ୍ଟରରେ ଥିବା ୱେଲ୍‌ଥ ସେଣ୍ଟର ପରିଦର୍ଶନ କରିବା ପରେ ଜଟଣୀ, କୋଣାର୍କ ଏନଏସି ଅଞ୍ଚଳରେ  କ୍ଷେତ୍ର ପରିଦର୍ଶନ କରି ସ୍ଥାନୀୟ ଜନସାଧାରଣ  ଓ ଏନଏସି ଅଧିକାରୀଙ୍କ ସହ ବିଭିନ୍ନ କାର୍ଯ୍ୟ ପ୍ରଣାଳୀକୁ ନେଇ ଆଲୋଚନା କରିଥିଲେ ଓ ପରବର୍ତ୍ତୀ ଦିନ ପୁରୀର ଜଳ ବିଶୋଧନାଗାର ପରିଦର୍ଶନ କରି ଅଧିକାରୀଙ୍କ ସହ ଆଲୋଚନା କରିଥିବା ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ସୂଚନା ଦିଆଯାଇଛି ।